Ҳар  қадар ки  лолаи  рӯят шукуфонтар шавад,

Оташи ишқи ту дар қалбам фурӯзонтар шавад.

Лутф кун, аз ҷой хезу ҳусни худро ҷилва деҳ,

Офтоб  андар  қиёми  хеш  тобонтар  шавад!

Шуд  табассумҳои  ту  ангезаи  илҳоми  ман,          

Ҳар гаҳе гул бишкуфад, булбул хушалҳонтар шавад.

Чун ту механдӣ,  яке бар  сад  физояд  ҳусни ту,

Ғунча зеботар шавад, ҳар қадр хандонтар шавад.      

Тундхӯӣ  мекунӣ,   гар  танг  оғӯшат  кунам,

Чун расад бар тангно, дарё хурӯшонтар шавад.

            Ҳар  гаҳе  гесӯи  мушкинро  парешон  мекунӣ,              

Он замон ҳоли парешонам парешонтар шавад.

Санъати қаннодии мо баски камравнақ  шудаст, 

Ханда кун, то ин ки ширинӣ фаровонтар шавад.

Дар барам биншин, ки дорад умри ман рӯ бар нишеб,

Дар  нишеб  оби  равон  доим  шитобонтар  шавад.

Меравад аз чашми ман селоби ашк аз дарди ишқ, 

Кулбаи  вайронам  аз  ин  сел  вайронтар  шавад.

 Аврангзеби Ориёӣ

Моро дар шабакаҳои иҷтимоӣ Telegram ва Facebook, ҳамроҳи намоед.