Нусхаи чопи
Сешанбе, 05 Марти 2019 07:22

Шеъри рӯз: Наврӯзи шинохти Фирдавсӣ

Муаллиф: Комил Бекзода

 Бар хирад бедод рафту додро нашнохтанд,

Ҳамзабонон ҳикмати Устодро нашнохтанд,

Баҳри инсон мезад ӯ бонги адолат дар ҷаҳон,

Ҳамдиёрон маънии фарёдро нашнохтанд.

Бар рухи бунёди зулмат офтобе пош дод,

Шабпарсатон аз қазо бунёдро нашнохтанд.

Номаи шоҳон накӯҳишномаи бедодҳост,

Нуктасанҷон рози ин бедодро нашнохтанд.

Аз шукӯҳу шавкати фарри ниёгон қисса дошт,

Ворисони нохалаф аҷдодро нашнохтанд.

"Он ки бо сеҳри сухан мулки Аҷамро зинда кард",

Камназарҳо шеваи эҷодро нашнохтанд.

Аз ҷафои давр андар кунҷи танҳоӣ муқим,

Ҳамзамонон шоири озодро нашнохтанд.

Алғараз, дар олами маънӣ расуле тоза буд,

Лек ин пайғамбари навзодро нашнохтанд.

Комил Бекзода

Моро дар шабакаҳои иҷтимоӣ Telegram ва Facebook, ҳамроҳи намоед.

Хондан 1114 маротиба