Дар ин чанд соле, ки вазифаи сардабирии ҳафтаномаи мустақили “Самак”-ро бар уҳда доред, маводу матолиби зиёди иттилоотӣ, илмӣ ва илмӣ-оммавиеро мунташир кардед, ки ба мавзуъ ва масъалаҳои муҳимми рӯз иртибот дошта, воқеиёти зиндагии миллии моро ба намоиш гузоштаанд. Гузашта аз ин, Шумо бо пахшу нашри хабару гузоришоти дархури имрӯзӣ, инъикоси ҳассосиёти замонӣ, бозтоб додани ҳаводису воқеиёти ватанӣ ва таълифу таҳияи матолиби ҷолиби илмӣ-оммавӣ вазифа, масъулият ва рисолати ҳирфаию миллиро софдилона иҷро намуда, сарнавишти хешро ба қишри рӯшангари миллӣ пайвастед. Хуш ба ҳолатон!
Зоҳиршоҳи гиромӣ, бо истифода аз фурсати муносиб ҷашни мелодатонро шодбош гуфта, бароятон сиҳҳатӣ, тандурустӣ, ҷуръату ҷасорати тозаи илмию эҷодӣ ва комёбиҳои беназири ҳирфаӣ-ихтисосӣ таманно мекунем. Пораи мухтасари манзумро, ки дар қолиби мувашшаҳ иншо шудааст, чун армуғони дӯстон манзуратон мекунем.
Бо эҳтиром,
маҳфили илмӣ-фалсафии “Ҷаҳони андеша”
ш. Душанбе, 3 январи соли 2024
Ҳамнишину ҳамшарику ҳамдами некустӣ!
(мувашшаҳ ба муносибати зодрӯзи Зоҳиршоҳи Сайфуллоҳ)
Зоҳиру ботин туро як бошаду якрӯстӣ,
Одами пуркору пурэҷоду пурнерустӣ.
Ҳар замон гар мушкиле пеш ояд андар зиндагӣ,
Ин яқин донам, ки моро дар бару паҳлустӣ.
Рӯду дарёҳо кунад шодоб хоки ин Ватан,
Шохаи рӯди Зарафшону бузург Омустӣ.
Орамидан дар ҳузурат, Зоҳиро, хуш давлате,
Ҳамнишину ҳамшарику ҳамдами некустӣ!
Зодрӯз фархунда ва муборак, шогирд ва дӯсти гиромӣ, Зоҳиршоҳи Сайфулло.
Бо эҳтиром,
Нозим Нурзода