Аз ин гузашта, Шумо дар пайгирии пайвастаи масъалаҳои иқтисодӣ, донистани барномаҳои навтарини компютерӣ, дастёбӣ ба гузинаҳои гуногуни расонаӣ, дарёфти нодиртарин маълумоту иттилооти роёнаӣ, муаррифии шоистаи сомона ва пойгоҳи иттилоотию таҳлилии “ravshanfikr.tj” маҳорату малакаи вежа доред. Омӯзиши бардавоми манобеи илмию ихтисосӣ, бозомӯзӣ дар курсҳои махсуси ихтисосӣ дар кишварҳои пешрафтаи ҷаҳонӣ, аз ҷумла Ҷопону Чин Шуморо миёни насли ҷавони ҷомеаи илмию ихтисосӣ ҷойгоҳ ва мақоми шоиста бахшидааст. Аз ташрифи теъдоди зиёди корафтодагон ва ихлосмандон дар утоқи кории Шумо маълум мегардад, ки аллакай дар миёни қишрҳои гуногуни иҷтимоӣ, фарҳангӣ, ихтисосӣ, фаннӣ ва илмӣ соҳибэҳтир гардидаед. Хуш ба ҳолатон!

       Чархонидани сомона-пойгоҳи “ravshanfikr.tj” ва танзиму такмили он аз тариқи ворид кардани маводи хуби омӯзишӣ, таҳлилӣ, пажуҳишӣ, илмӣ-оммавӣ, бадеӣ ва эҷодӣ кори саҳлу осоне нест, вале Шумо бо такя ба дониш, биниш, маҳорат, малака ва таҷрибаи барномасозӣ аз уҳдаи ин кори мушкил бармеоед. Мунтаҳо, Шумо шиори “огоҳӣ, озодӣ ва ободӣ”-ро на танҳо чун сартитри пойгоҳ, балки минҳайси меъёри зиндагии инфиродӣ пазируфта, дар масири бедорӣ, огоҳӣ ва озодагӣ қадам бармедоред. Ба ин маънӣ:

                 Бар рағми ғам талош андар нишоту шодӣ бошад,

                 Шиорат “Огаҳӣ, Озодию Ободӣ” бошад.

       Аз фурсати муносиб истифода намуда, зодрӯзатонро самимона шодбош гуфта, дар фаъолияти минбаъдаи хонаводагӣ, иҷтимоӣ, корию идорӣ ва илмию эҷодиатон муваффақияту комёбиҳо таманно мекунем. Воқеан:

            Бо ҷӯшу гармию сафо дилҳо мунаввар мекунӣ,

            Бо ҷуръату озодагӣ моро диловар мекунӣ.           

            Бо шӯру исёни ҳунар донӣ, ки Бозори Ибод

            Ин растахези зиндагӣ Бозори маҳшар мекунӣ!

Бо эҳтиром,

аъзои маҳфили “Ҷаҳони андеша”

ш. Душанбе,

28 сентябри соли 2023