Илму фан меоварад, бар умри Одам рӯзи нав,

Нав ба нав зистан шиори зиндагонӣ мешавад.

Олами атроф ҳам з-ин ҷилваҳо маҳрум нест,

Чашми ибратбин агар дорӣ, айёнӣ мешавад.

Сабзаву гул дар чаман мафтуни ҳусни хештан,

Булбули шӯрида ғарқи шодмонӣ мешавад.

Ғунчаҳо бар лаб табассум рӯ ба сӯи Офтоб,

Боди Наврӯзӣ чу ояд, гулфишонӣ мешавад.

Ин биҳишти нақдро, гар шоире бинад, яқин,

Шавқу илҳоми заминаш, осмонӣ мешавад.

Бо назокатҳои худ, Наврӯз оламгир гашт,

Як ҷаҳони мо чӣ бошад? Сад ҷаҳонӣ мешавад!

                                      (Баҳори 2012)     

                                                                                                           Комил Бекзода