Махсусан, ғазалу тарона, рубоию дубайтӣ ва шеъру чакомаҳои Шумо, ки маҳсули зеҳн, тахайюл, эҳсос, тасаввур, дидгоҳ, мавқеъ ва салиқаи вежаатон аст, сафаҳоти фейсбукиро рангин мекунанд ва қариб ки рӯзе нест, бо чакомае хотири корбарони шабакаҳои иҷтимоиро шод насозед. Маҳз шахсияти отифӣ ва ҷанбаи ҳиссӣ-тасвирии шеъри Шумо мавриди таваҷҷуҳ ва писанди доираи васеи корбарони шабакаҳои иҷтимоӣ ва ҳаводорони шеъру адаби миллӣ гардидааст. Аз ин ҷост, ки Шумо ба унвони падидаи матраҳи муҳити адабию эҷодӣ шинохта шудаед. Хушо, табъу завқе ҳамчунинӣ!
Гузашта аз ин, таҳқиқоти муфассали илмӣ-ихтисосии Шумо дар заминаи лаҳҷа-диалекти ирониёни Бухоро, ки бо номи “Диалект бухарских иранцев” (-Душанбе: Ирфон, 2015) нашр гардидааст, аз зумраи беҳтарин таҳқиқотҳои илмӣ дар ростои шинохти шева-лаҳҷаҳои ирониёни Бухоро ва умуман, диалектологияи миллӣ маҳсуб меёбад. Ба ин маъно, Шумо дар феҳристи муваффақтарин донишмандону забоншиносони муосири миллӣ қарор доред.
Аз фурсати мусоид истифода бурда, рӯзи мавлуди Шумо — Сабур Носири азизро шодбош гуфта, дар зиндагии хонаводагӣ ва эҷодиатон барору комёбӣ таманно мекунем. Бигзор, фараҳу оромиш, тандурустию осоиш ва болидагию ромиш ҳамқисмати рӯзгори Шумо ва хонаводаатон бошад. Дар воқеъ:
Забони шеърро дигар садойӣ,
Ки савти ишқро созу навойӣ,
Ба аҳли дарду ғам дардошнойӣ,
Дили захмини ёронро давойӣ,
Агар пурсанд: Кию аз куҷойӣ?
Ҷавобаш ин: Сабур Носири мойӣ!
Зодрӯз муборак, Сабур Носири гиромӣ!
Маҳфили “Ҷаҳони андеша”
4 октябри соли 2022