Имрӯз тамоми қонунҳо бо такя ба ҳуқуқу озодиҳои инсон қабул гардида, инсонро дар меҳвари арзишҳо қарор додаанд. Бо назардошти пайдоиши муносибатҳои ҷадид зарурати шинохти ҳуқуқу озодиҳои инсон бо диди нав дар тамоми марҳилаи ҳаёти инсонӣ ба вуҷуд меояд. Ҳуқуқу озодии инсон ин маҷмуи зарурат ва қонуниятҳои зист аст, ки инсон барои зиндагӣ ба онҳо эҳтиёҷ дорад ва барои инсон имконият медиҳад то ҳамчун як махлуқи бошуур арзи ҳасти намояд.   Мусалам аст ки инсон бидуни доштани ҳуқуқу озоди дар ҳаёти сиёсӣ ва иҷтимоии ҷомеа ширкат варзида наметавонад. Ин ҳуқуқ ва озодист, ки барои инкишофи инсон дар ҳаёти сиёсӣ, иқтисодӣ, иҷтимоӣ ва фарҳангӣ шароит фароҳам меоварад. Бояд тазакур дод, ки Ҷумҳурии Тоҷикистон ба ҳуқуқу озодиҳои инсон эътибори хосса дода онҳоро чун арзиши олӣ шинохта дар низоми ҳуқуқии кишвар ба таври арзанда иникос ёфтаанд. Аз ҷумла дар моддаи 5-уми Конститутсия арзиши олӣ доштани инсон дарҷ гардида дахлнопазирии ҳуқуқҳои фитрии инсон кафолат дода шуда аст. Инчунин кафолати ҳифз ва таъмини ҳуқуқу озодиҳои инсон аз сӯйи давлат, яке аз унсурҳои давлати демократи ва ҳуқуқбунёд ба ҳисоб меравад, ки дар Конститутсияи Ҷумҳурии Тоҷикистон бевосита дарҷ гардидаанд. Мазмуну муҳтавои тамоми санадҳои меъёри ҳуқуқиро ин ҳуқуқу озодиҳои инсон ташкил дода, дар якҷоягӣ ва ё алоҳида барои ҳифз ва таъмини онҳо амал мекунанд.

  Инсон чун мавҷуди зиндаи соҳибхирад чӣ аз назари физиологӣ ва чӣ аз назари маънавӣ ҳамвора дар ҳоли рушду таҳаввул қарор дорад. Мавҷуди кушо ва ҷӯёву пӯёест, ки ҳамеша мехоҳад доир ба худу ҷаҳон ва ҷомеаву дар кул олами ҳастӣ маълумоти наверо ба даст оварад. Ҳамин аст вижагӣ аст, ӯро аз ҳамаи анвоъи зинда бартар месозад. Яъне вобаста аз шинохти дурусти вазъ ва таҳлилу озмоиш дар баробари ҳар ҳаводис тасмимгирӣ менамояд. Дониш таҷриба ва ҷаҳонфаҳмиву ҷаҳоншиносии ӯ ҳамеша дар ҳоли тағйир ва комилшавӣ аст. Аз тарафи дигар ин ҳама донишу таҷрибаву илм ва фанноварӣ ё худ ҳар ончи хоҳ аз назари моддӣ ва ё маънавӣ инсонҳо сохтаву пардохтаанд, меҳвари ҳамаи онҳо саодати  инсон ва зиндагии инсонӣ аст. Мафҳуми мардумсолорӣ низ пеш аз ҳам гирифта аз бузург ва арзишманд донистани мардум ва зиндагонии мардум аст.

  Вазъи сиёсии ҷаҳони имрӯза нишон медиҳад, ки тамоили миллигароӣ дигарбора шиддат гирифта, пояҳои сиёсӣ ва иҷтимоии давлатҳо бо назардошти арзишҳо ва манофеи миллӣ шакл мегиранд. Фарҳанги миллӣ бошад таваcсути ташаккули мафкураи миллӣ ва истеҳсолоти иқтисодӣ рушд намуда, ба ҷаҳониён муаррифӣ мегардад. Яке аз омилҳое, ки сабаби ба вуҷуд омадани давлатҳои миллӣ гаштааст, ин  пайдоиши ҳаракатҳои озодихоҳи миллӣ ҷиҳати дарёфти истиқлол ва таъмини инкишофу ҳимояи арзишҳои муштараки онҳо мебошад. Маҳз ҳифзи арзишҳо ва дастовардҳои таърихию фарҳангӣ ба шаклгирии чунин давлатҳо боис гашт. Аз дигар тараф, фароҳам овардани шароит ҷиҳати мустақилона муайян сохтани масири инкишоф ва тараққиёти миллат, инчунин талош баҳри ормонҳои миллӣ давлатҳоро барои ҳифзи арзишҳои миллӣ водор месозад. Миллати озодро шарти зарурӣ ин аст, ки дар сатҳи умури давлатдории миллӣ низоми қонунгузории давлатиро, ки асоси амният ва тартибот мебошанд дар пайвастагӣ бо арзишҳои миллӣ ва иродаи мардум мустақилона муайян намояд. Чунин раванд яке аз падидаҳои истиқлоли миллӣ мебошад. Дар замони муосир вуҷуд доштани истиқлоли миллӣ василаи муҳим баҳри рушди давлатҳои мутамаддин ба шумор меравад. Зеро ҳеҷ як давлати миллӣ бидуни роҳандозии муносибатҳои хориҷӣ ва пешбурди манофеи миллӣ дар сиёсати ҷаҳонӣ наметавонад рушд намояд.

  Абдурраҳмони Мушфиқӣ (1525-1588) аз намояндагони бузурги ҳаёти маданӣ-адабии нимаи дуюми асри ХVI тоҷик буда, бо мероси ғании адабӣ ва хислати эҷодиёти худ дар таърихи адабиёт ва маънавиёти ин аср ва умуман фарҳанги асрҳои ХVI-ХIХ мавқеи намоёнро ишғол менамояд. Дар сарчашмаҳои адабӣ ва таърихӣ омадааст, ки «Мавлоно Мушфиқӣ аз шоирони машҳур аст, дар гуфтани анвои шеър салиқааш накӯст, қасоиди хуб ва ашъори марғуб дорад. Дар ҳиҷо гуфтан табъаш ба тавре диққат менамояд, ки маълум нест, ки касе адили (ҳамвазни) ӯ буда бошад»[1]. Чунонки аз сарчашмаҳои таърихӣ бармеояд, Мушфиқӣ дар ҳиҷо (ҳаҷв) гуфтан табъи болиғ дошта ва дар ин майдон бебадал ва бемонанд будааст. Ба ҳама маълум аст, ки ҳаҷв ба худии худ дар ҳама давру замон ва дар байни ҳама қавму миллатҳо баёнгари эътирози иҷтимоӣ буда, зимнан шоир аз ҳуқуқи поймолшудаи табақаҳои мазлум пуштибонӣ менамояд.